Харид Қилиш Саватчаси

Жами

Янгиликка интилган ўқувчи тадбиркор

27/Mart/2024 12:49
  737

Азамат Ҳамроев Зангиота агросаноат касб-ҳунар коллежи ўқувчиси. Коллежнинг 15 сотих тажриба майдонида уч йилдан буён помидор экиш билан шуғулланади. Ҳосилнинг бозори чаққон. Кўчатлар гулини чанглантиришда асаларилардан фойдаланилади. Томчилатиб суғориш орқали сув ва минерал ўғитларнинг 90 фоизи тежалмоқда, деб ёзади ЎзА.

Азамат ёш бўлишига қарамай ернинг, деҳқончиликнинг “тили"ни яхши тушунади.

Тадбиркорлар ва ишбилармонлар ҳаракати – Ўзбекистон Либерал-демократик партиясининг “Ёшлар қаноти” томонидан ташкил этилган “Ёш инновациячи” кўрик-танловида иштирок этган ёшлар турли соҳаларда ўзаро тажриба алмашди. Ишлаб чиқариш ва сервис, туризм, қишлоқ хўжалиги соҳаларини ривожлантириш борасида ишлаб чиқилган инновацион ғояларга эга ёшлар учун мазкур танлов мулоқот майдонига айланди.

Азамат ўзи каби тўрт тенгдоши билан бирга Жанубий Американинг ёввойи помидорига ўзимизнинг жайдари помидорни пайванд қилган. Ҳозирда ички бозор учун маҳсулот етиштираётган бўлса, келгусида экспортбоп, сифатли маҳсулот етиштиришни йўлга қўймоқчи. Шу билан бирга полиз маҳсулотларини қайта ишлаш борасида ҳам креатив ғоялари бор.

Янгиликлар, режалар ва инновацион ғояларга эга Азамат каби ёшларнинг хатти-ҳаракатлари юртимиз ривожи, турмушимиз фаровонлиги, иқтисодий барқарор тараққиётимизда муҳим аҳамиятга эга.

Манба: www.uza.uz

Улашиш: