Тадбиркор “теримчилар”
23/Dekabr/2024 18:23
1150
Деҳқонлар етиштирилган пахта ҳосилини нест-нобуд қилмасдан йиғиштириб олиш билан банд бўлган шу кунларда элнинг бу эзгу ташвишидан қинғир йўл билан даромад орттириш йўлида фойдаланиб қолишга уринаётган айрим кишиларнинг ҳаракатини инсофсизликдан бошқача нарса дейиш мумкин эмас, деб ёзади ЎзА. Жиззах вилояти Шароф Рашидов туманидаги "Саройлик" маҳалласида яшовчи Шокиржон Тўйчиевнинг олисроқ ҳудудларда пахта тераётганларга совун, кир ювиш кукуни каби рўзғорга зарур нарсаларни етказиб бериш баҳонасида дала айланиши одамларда шубҳа уйғотгани бежиз эмас экан. Ички ишлар ходимлари томонидан ўтказилган суриштирув давомида у олиб борган нарсаларни терилган пахтага алмаштираётгани аниқланди. Унинг хонадонидан 149 килограмм пахта топилди. Шу маҳаллада яшовчи Дилшод Каримов эса хонадонида пахтани қайта ишлашни, яъни, қўлбола ускуна ёрдамида пахтадан чигитни ажратувчи “тадбиркорлик”ни йўлга қўйганлиги аниқланди. Унинг хонадонидан 385 килограмм пахта, 58 килограмм чигит ҳамда 38 килограмм пахта толаси топилди. Аниқланишича, у хомашёни тумандаги “Зарафшон” сув истеъмолчилар уюшмаси “Шоирабегим гуллари” фермер хўжалиги далаларидан яширинча териб олган, яъни тўғридан тўғри ўғрилик қилган. Зафаробод тумани ҳудудида ички ишлар ходимлари томонидан тўхтатилган “Нива” русумли автомашинада Пахтакор тумани, Боғишамол қишлоғида яшовчи Санжар Ҳайитбоев 210 килограмм пахта олиб кетаётгани аниқланди. Унинг айтишича, пахтани Зомин туманидаги “Пишоғар” бозорида нотаниш одамдан ҳар килосини 8 минг сўмдан сотиб олган эмиш. Вилоят ИИБ ахборот мультимедиа гуруҳи айни вақтда ҳар учала ҳолат юзасидан суриштирув ишлари олиб борилаётганлигини хабар берди.
Манба: www.uza.uz
16+